DZ

2006无写到总结，依家比较懒，所以贴下2006的相了事。

呢张系上年年初一晚同关小姐、阿Sa仲有她表妹系白鹅滩睇嘅烟花，当然今年都会继续去睇。

2月4号初七，决定要变下给人话左好耐嘅发型，系关小姐陪同下第一次去点发。

2月10号，同屋企仲有爸爸的旧工友去左两日从化，临走去草莓园摘草莓。

我实唔中意就同爸爸妈妈或者伯伯婆婆级嘅人去旅行，相当郁闷，于是就得闲到自拍。。

4月12号，系宿舍无聊自拍，已经系表情最正常出得街果张。

果段时间罗左G5返宿舍，除左影无表情或者表情奇怪嘅自己，仲会得闲影下万里无云嘅晴天仲有风打横吹嘅大雨。

 4月14号生日，同关小姐仲有小白系Pizzahut庆祝，小白送嘅小礼物。

可惜后来呢棵给我认为会长大变成吃人花嘅植物给我淋水过多嘅“溺”爱下瓜左。

5月2号同关小姐去左大学嘅高同学屋企，系珠江中间同莲花山打对面海鸥岛。

呢到真系几自然，有河涌鱼塘，大片嘅田，居然离广州唔系好远。

5月4号，发觉之前个发型已经变左，本来想住去剪，点知又电过，真系电开有瘾。

罗新买嘅E680i影嘅，可以慢慢甘手写同影的粗糙嘅相，第一部手机6610用左接近3年之后已经老弱病残。

5月14号，传说中影下万里无云嘅相，好好嘅天气。

位置系宿舍旁边嘅走廊，前景系华工，然后系南部商业区，仲有最远嘅广工。

5月18日，系返屋企嘅4号线上面对住对面嘅窗口影嘅，

果时我几乎个个星期都返屋企，我系有的对功课逃避甘“逃”返屋企。

7月3号，复紧习就快考试，一早就去左晚修，但课室太闷热，放低书包系A1楼顶影天空。

同期发现都有人影过黄昏嘅天空，果时想虽然会系同一个天下面想同样嘅野但距离系甘远。

英语公共课终于上完4个学期，我虽然无唔及格但成绩都几惨不忍睹。

呢个英语C班上课都几开心，睇老师影相个样就知。

相到有日期啦，同关小姐去一齐想住睇歌德堡号嘅烟花，点知最后走先从高楼之间睇到少少。

总之就觉得给人水左，仲撞到系依家大学隔离班同学嘅高中隔离班同学，可惜其他相我影得比较鬼魅。

8月13号，放假返左乡下拜山，不过呢次就随便去左好多地方玩。

系五华县益塘水库嘅游船上面，一个听讲一日都游唔晒尚待开发嘅大水库。

10月4号，同关小姐去左逛华工本部，行到脚都软仲行错路，我读华工不过系大学城校区。。

10月27系5中55周年校庆，同教我物理嘅古小红老师合影，

老师话因为我上课经常训觉但成绩都唔错所以仲记得我，哈哈。。

学校系我地走左之后理所当然甘更加靓，不过要我剪头发嘅死肥仔主任仲系到阴魂不散，

2年之后已经唔系好多4班嘅同学会返来，但5中仲系5中。

10月28日，软件4班第二次去旅行，清远太和洞爬到上顶先发现原来真系高三旅行来过。

又来个古怪表情，居然唯一一齐爬上嘅同班同学系高中嘅隔离班同学。

11月15日晚黑系新建成嘅图书馆到自习，对住窗口影里面嘅影，我读书勤力左好多，至少系话无以前甘懒啦。

然后功课就越来约忙，我连影相闲情都无埋，2006甘就过左啦。。。

放假有成半个月，原来写blog系一种习惯，自从12月有复习当藉口之后就再勤力唔返。

平时有时会想个blog要点写，但最后乜都无写出来，同依家嘅状态差唔多。

放假借左一堆书返屋企，结果都摆得几整齐，睇过一两本嘅一两页。

放假之前接到以前一个一齐画画嘅同学电话，叫帮手搞一个视频互动软件，唔知点推迟。

其实我呢方面一的都唔识，不过学美术嘅人就会认为你只要学编程就咩都识编。

误打误撞终于知道用OpenCV库，用左2个星期先搞终于建好环境运行到的例子。。。

我唔想再提果的一放假就唔见晒人嘅“组员”，反而接触到同样广大学软件嘅人有的感触。

有非常串貌似几犀利话要入微软嘅人（我持保留态度），仲有其他比较乐意帮助人同接手呢个项目嘅人。

似乎人第学得知识范围更广，更积极了解各方面嘅技术，我地华工嘅软件学生似乎唔可以就满足于搞掂英文嘅课程。

每日要睇各种各样嘅文档，可以成功编译一个程序嘅话都唔算枯燥，要继续落去。。